Jahrbuch der Gesellschaft für Geschichte der Juden in der Čechoslovakischen Republik · 1935-01-01 · 7 (1935) · page 80

die Helfft alß 30 Sch. 30 Gr. sambt den Czinßen, die andtere Helfft alß 30 Sch. 30 Gr. will er ihnen geben vndt zallen vff nechstkünfftig Weinachten auch sambt dem Czinßen, daß also die Habtsumma nebest dem Czinßen, so drauffgehen werdten, der 61 Sch. sollen vergnügett vndt bezahlet werdten. In Fal er aber sein Hauß vndterdeßen verkauften wurdte, so soll vndt will er die obbenandten Judten von dem Angeltt deß Haußes befridigen vndt bezallen. Zu mehrer Beglaubigung hatt er mit Handt vndt Mündt gerichtlich angelobt, deme instendtig nachzuleben, vndt solches auch in daz Schultbuch einverleibet worden. 19a. Ingeleigen hatt sich Hanß Wolff Saffensieder alhie zu Commuthaw newest seiner Haußwirdtin ehwenermaßen wie oben gemeltt mit dem Judten von Eytzlitzs als Isack vnd Salomon, beide Gesellen, vormöge seiner Handtschrifft vnd Sigill berechnet vndt hat sich befundten, daz er ihnen Stamsumma vndt Czinß vorbleibet biß vf dem 5. Marty ano 1614 alß 34 Sch. 28 Gr. 6 Pf., gemeldte Summa soll vndt will er zallen alß vff nechtskünfftig Pfingsten 17 Sch. 14 Gr. 3 Pf. sambt dem Czinßen, die hinderstellichen 17 Sch. 14 Gr. 3 Pf. will er ihnen auch geben vnd zallen vf nechstkünfftig Weinachtten vndt daz alßo die 34 Sch. 28 Gr. 6 Pf. vorgnigt vndt bezalt werdten. Solches er dan ebbenermaßen gerichtlich mit Handt vndt Muntt angelobtt vndt vmb steder Haldtung inß Schultbuch verleibt wordten. Aus dem Gerichtsbuche von 1613—1615, S. 32v. 20. 1614 März 13. Bezahlung von Schaffellen durch Schuldner des langen Abraham, Juden aus Eidlitz. Dem 13. Marty a. 1614 ist vor mir Hieronymuß Betzholtt, domals voraidten Stadtrichter zu Commuthaw, erschienen Marttin Schuster, ein Lohgerber alhier, vndt hatt bekandt, daz er dem langen Abraham Judten zu Eytzlitz schuldig ist am rohen Schaffellen, derer 156 Stück, daß Stück p. 9 Gr., thut 23 Sch. 24 Gr., dazu dan auch gehörett vndt hatt die Fell die Helfft genommen sein Mitmaster Andonius Heyer, dez Pauli Kollers Aiden, hatt derowegen gemeldter Merttin Schuster angelobt, sein Dahl, waß auff ihme kommen wierdt vndt sich in der Reidtung befinden, zu zallen von dato in 6 Wochen. Geschehen ut supra. 77